المؤلف:
الإشراف التربوي
مقالات الأوائل

20 نصحية بزيارات العيد : ‫#‏رشة_ملح‬ 
1. لا تفطر ...قدامك اطنان من القهوة والمعمول ‫#‏تخطيط_بعيد_المدى‬ !
2. نام ليلة العيد وخصوصا اذا كنت مش قادر تطبق النقطة 6
3. اذا كنت بتعيد ..انتقل للنقطة 4 ..,اذا كنت بتتعيد انتقل للنقطة 5
4. خلي جيبتك صراف آلي (دنانير كثير ..خمسات ...عشرات اقل ..عشرينات اقل ..لا تحمل خمسينات ) 
5. فكك من الخجل الكذاب ؛ ولا تقعد تتشحود ..اول ما يقلك تعال ..روح واعتبرها العيدية شهادة تقدير لجهودك العظيمة (خلي عندك خيال) 
6. لا تسوق ؛ خلي حدا غيرك يسوق وقتها حط راسك ونام 
7. برمضان كنت تتسحر ..بليلة العيد في سحور من نوع ثاني ..شوف نقطة 8 و 9
8. سحور الموبايل ( اشحن بطاريته )‫#‏مافي_مجال_تشحن_عند_الناس_الزيارة_قصيرة‬
9. سحور كرت الشحن (عبي رصيد والاهم حزم النت )‫#‏لا_تقطع_حالك_من_النت‬
10. حبة الشكولاتة ..يا بتاكلها ...يا بتتركها ..اوع تحطها بجيبة البدلة ....‫#‏الدنيا_صيف‬
11. اذا نسيت النقطة 10 ..في محل دراي كلين بضاحية الرشيد بيعمل خصومات كويس !‫#‏قله_من_طرفي‬ 
12. لا تدخل آخر واحد على قرايبك ..يمكن ما تلاقي كرسي ...!
13. اذا شبعت معمول وخايف يقلب بطنك مخبز ؛ وبدك تعتذر بالعقل طبق الاستراتيجيات التالية 
أ. عندي سكري والمعمول مش كويس للسكري ( ‫#‏استراتيجية‬ العذر الطبي)
ب. والله شكله بشهي ..بس اكلنا كثير ...ابن عمي فلان ما اكل ( #استراتيجية التاج والمنشن tag) 
ج. يسلمو ايديك ..خليه على الطاولة ..انا هسه بضيف حالي .....(#استراتيجية كسب الوقت )
د. انا ما بحب المعمول ...في عندكم سنكرز .... ( #استراتيجية ماري انطوانيت ) 
14. فنجان القهوة ...عشان ما تقلب معدتك محامص بن العميد ..طبق ما يلي :
أ. اطلب مسبقا لا يكثر بالفنجان ...البعض بعبيه تقول بعبي بمية زمزم ...(استراتيجة الوقاية)
ب. لا تنسى تهز ايديك بالفنجان ..ولا رح تضطر تخلص الدلة (استراتيجية الكتالوج)
ج. لا تعلق على القهوة ..حتى لو كانت باردة ..اعتبرها iced coffee
د. اذا صبلك القهوة لا تتناغش وتقله ‫#‏صايم‬ .. قله مثلا (بدي اياها حلوة غلي ..قله مثلا : هاي بن عميد ...) هاي جديدة ....على فكرة مش ضروري تقله اشي ..اشرب وحل عنا بنغاشتك !
15. للكبار : كل عملة ورقية حطها بجيبة ...بلاش تخربط بين الدينار والعشرين‫#‏بلاش_تروح_عليك_يا_حزين‬ 
16. اذا الشيطان قلك (الخمسة مش عيدية ..لا تعيد..بلاش تحرج نفسك ) ...يا اخي لا ترد على شيطانك ..الخمسة كويسة ...ادفع وتعملش فيها برستيج ...ادفع خلي غيرك يترزق !
‫#‏فاصل_اعلاني_للتوجيهي‬ : ترقبوا مبادرة آت لاختياري في فندق حياة عمان ، قاعات زارا بداية شهر 8 القادم لمساعدتكم على اختيار التخصص الجامعي /المهني وكل ما يتعلق به ..التفاصيل على موقع الأوائل ...
17. لما بيجي الصغير بسلم عليك ..هوه متأمل فيك الخير ..وشايف فيك بطولة‫#‏زورو‬ وشهامة ‫#‏روبن_هود‬ ...استرجل واعطيه دينار ..الا بحالة النقطة 18 
18. اذا لقيت بانتظارك (فريق ناشيئن 12لاعب ههه) ...والكل من جماعة النقطة 17 ..تخيّلهم سنافر واقلب شرشبيل ...انت صحيح نشمي بس انت مش حاكم كوكب زمردة 
19. حاول تفهم من والدك زيارات العيد بالتفصيل ..ارسم خطة الطريق بعقلك ولا تنسى تطبق النقطة 6 ....اذا تجاهلت هاي النقطة رح تلاقي حالك سرفيس !
20. اذا فتحوا مواضيع بالقعدة واضطريت انك تسولف احكي الجمل التالية :
. الوضع تعبان على الكل
. بقولوا في رفعة اسعار 
. الجو كويس هاليومين 
. والله رمضان مرق بسرعة 
. يا اخي ازمة الشوارع لا تحتمل
. خلصنا من النسور وما خلصنا من قراراته
. والله الارجنتين حرام تخسر ...وشكله المانيا رح تاخذ البطولة
. ما شاء الله اثاث البيت كثير مرتب ...
. مع الصغار : ما شاء الله انت عبود ...والله كبرت ...بأي صف صرت ..؟ كم معدلك ؟ 
. والله شرطي السير مش مقصر ...قد ماخالفوا هالناس 
. اسمعت ضايفين ضريبة على فاتورة الكهرباء ...ليرتين نظافة ..صح ؟
. يا اخي داعش هاي من صنع امريكا وايران ...الله يخلصنا منهم 
. صلاة العيد اليوم كانت حلوة بس الخطيب طول بخطبته كثير
. اذا قعدت مع شاب عاطل عن العمل : والله مافي شغل بالبلد 
. اذا قعدت مع خريج : في شغل بالبلد ...بس بدك تدور منيح 
. اذا قعدت مع توجيهي : قربت النتائج ...تابع حسام عواد بنزل اخبار النتائج اول بأول !
. اذا قعدت مع ...شكله القعدة عجبتك ...يا اخوي لا تطول القعدة ..وراك زيارات !
21. احفظ الردود التالية : 
. كل عام وانت بخير ...الرد : وانت بألف خير يارب ..تفضل معمول 
. عساكم من عواده ....الرد : ينعاد عليكم بالخير ...تفضل معمول 
. تقبل الله منكم الطاعات ..الرد : جمعا .. منا ومنكم ..تفضل معمول 
. من العايدين والفايزين ..الرد : من السالمين والغانمين ..تفضل معمول 
. عيد مبارك .........الرد : الله يبارك فيك .. مبارك علينا وعليك ..تفضل معمول
. اذا قلك جملة جديدة وانعجقت : رد بصوت غير مسموع وكانه فاهم شو بتقول ...احكيله (هلنشسبيكمجمعنا ..تفضل معمول )

تابعنا على الفيسبوك :

. صفحة الأوائل 

. صفحة الاستاذ حسام عواد

 

أوائل - توجيهي أردني